甚少提及自己家事 , 但真係忍無可忍 , 谷到爆 , 究竟家姐同阿哥 , 有冇關心我呢個妹 ?
我個所謂阿哥 , 一生最叻度橋問阿媽度 $ , 阿媽錫仔俾 2 成 $ 到阿哥層居屋 , 攪到户口得番 $ 5000 !
阿媽原本有層樓留俾我做姑婆屋 , 我見媽咪同爸爸退哂休 , 點生活落去 , 我婉拒層樓叫阿媽賣樓套現 ! 然後揸現金搬去同阿哥住 !
阿媽將筆賣樓錢一分為二 , 用左 65 萬買左層新樓由我同家姐供 , 再俾一筆共 $ 70 萬我個阿哥放落層居屋度 , 供少 d !
( 阿媽之死遲 d 再講 , 都係俾阿哥溵死 )
2003 年阿媽阿爸都先遊 , 淨番一間俾左 4 成仲要供當年負資產嘅屋 , 我同家姐問阿哥俾管理費 , 咪加埋佢個名落去 , 佢一句話冇錢唔要賺蝕唔關佢事 !
我家姐要 $ 180 萬賣樓但我唔想 , 就同家姐 deal 到 189 價位 , 無論昇跌我都會俾番個差價 , 當年訂個價位有得賺 40 萬 !
我話只要番阿媽俾左首期 , 同我自已供果份 , 家姐出過嘅一分一毫連律師費 , 賺左嘅歸家姐所有 ! 約 52 萬 !
接著我負責俾哂供樓錢 , 管理費 , 差餉地租 , 另每月再俾 $ 3000 利息家姐 ! 我同家姐講分期俾番畢錢 , 佢話想一筆過 , 我亦講如佢等錢用 , 可即還 ....
試問我開一個對家姐有利嘅條件 , 52 萬擺邊度可以每月收 $ 3000 利息 ! 當年我向哂長輩同阿哥講 , 呢個條件大家都認同好合理 !
如是者過了幾年 , 舊年我一筆過俾番家姐 , 連佢每月收到嘅 $ 3000 , 家姐共收到近 80 萬 ! 試問一間一亳子都唔駛俾 ( 連律師費都係我俾埋 ) 仲有錢收 , 呢個係非常合理事情 !
偏偏 d 無謂人 , 包括姐夫 , 阿姨姨丈 , 阿哥阿嫂 , 就多多事幹 , 話樓價升到 400 萬 , 分咁少俾個家姐 ? 話家姐應收番個差價 ....呢件事成為左一條刺 ...
各位唔該評吓理 :
1 ) 當年家姐不理親情 , 硬係要賣樓 ! 我接手咁做係想守護媽咪留低嘅財產 !
2 ) 多年來我不斷講要錢就即刻俾番家姐 , 家姐話驚阿哥問佢借 , 擺我度安全 !
3 ) 全世界冇話買樓一定升 , 我都估唔到升成咁 , 升就問我攞 , 咁跌左就唔駛負責 , 世上邊有你地著數哂 ?
今日我嫁得好老公 , 都係我小心去揀 , 佢地見我唔等 $ ,又係一個小富婆 , 就攪風攪雨 , 又無聊又多事 ! 雖然我家姐唔敢對我有要求 , 但我知佢都受人影响 !
仲有要食多隻死貓 , 家姐叫我唔好同阿哥講 , 巳轉名俾 $ 佢嘅事 , 驚阿哥又度佢 ! 如是者明明做足功夫 , 背後都要俾人講是非 , 溵到我情緒低落 !
餅爸好錫我見到咁 , 想報意法 10 天團 , 20 號出發 , 但我都係冇心情去呀 ! 谷到爆 .......
唔好用人地既過錯嚟懲罰自己！嬲壞自己架咋！我完全明白d無情既手足係點樣 .......
回覆刪除使乜理佢地, 你直頭唔使同佢地來往, 反正都冇當你係屋企人.... 你家人都冇contribution, 要分? 比d証明黎再講啦.... 佢地小心d講嘢丫, 可以反告佢地添丫... 開心d去旅行啦, 意法丫.... 有咩要托你買好呢???
回覆刪除–家吳知一家事,但我＋分理解,有錢又爭,冇錢就發窮惡,好似欠佢一世咁, 唉,你好彩仲有餅爸錫,珍借眼前人呀!
回覆刪除老人家不再頭家便散哂,有時好似是外人一般
回覆刪除咁....即係冇親戚做囉. 唔係你的損失黎 . 比????比條餅毛佢囉 . 餅爸咁識做, 你唔好浪費餅爸的一番心意 , 去玩啦. 禾要手信
回覆刪除妳己盡力做咗要做嘅事，問心無愧。唔使理嗰啲守株待兔、輸打羸要嘅咗極品 。難得餅爸咁窩心 ，咪去意、法一趟，散吓心，充吓電，入吓貨咁囉。Release 完就算，唔好再激氣，咪傷身呀！
回覆刪除當佢地係家人, 但佢地就現實! 你要做既都做左, 你無欠佢地既, 唔洗理佢地啦~
回覆刪除餅媽, 唔好激氣 ! 啲無謂親戚無需要理會
回覆刪除真係一講到錢，兄弟姐妹都無情講，呢啲係我屋企都有發生，唉
回覆刪除這種只講$家人可以唔洗理佢地，只要自己已盡力去做就夠，餅爸真係好老公，知你咁唔開心，專登帶你出去散心，你就去鬆一鬆唔好再為這些人苦發自己。
回覆刪除哈哈！睇翻啲留言，甘餅罐集團都係關心手信多啲喎 嬲一陣好喇，費事自己辛苦，你勞氣，人家又不會受苦，唔化算呀！哩度講出嚟發洩下咪幾好囉！ 哩啲事好輕鬆，我都經歷唔少，平常事一單啫，下次見面畀我攬下無事喇，錫翻先 p.s.我都要手信呀
回覆刪除家家有本難念的經~~~仲有丫你有錢不如買多d野比發少同餅少玩同食仲好喇~~起碼發少同餅少都心存感激~~~~最重要既係唔使激心~~~
回覆刪除唉！講到錢，父母、兄弟姊妹、仔女都係假，錢可以大過天
回覆刪除我亞媽係好煩、文塞、但係始於都係亞媽，大哥六＋歲左右仲可以問八十幾歲住係老人院既亞媽攞錢，仲話自己六＋幾歲唔使黎探你（亞媽），每次探你要使成百元
好少見你寫到咁 ! 要是這樣, 除了他們那邊以及家人, 你還有你老公對你好. 最緊要良心無錯, 下氣去旅行散散心吧!
回覆刪除人的本性就是這樣啦!
回覆刪除去啦, 去旅行啦,
個個都問你攞手信呀
如果道理係自己度就要企硬!!!! 其他無謂人講咩都唔好理, 仲有呀,唔好激心, 大把人/貓支持你咖!!!!
回覆刪除唉.... 大把人係咁，一講$就無感情！ Forget it啦，唔好嬲，唔值得呀！ 把口生係人哋到，佢鐘意講咩，由佢啦，等天收！
回覆刪除一講錢..就無人性架啦..!!
回覆刪除最討厭呢D親人！好就親人，唔好就激死人！
回覆刪除餅媽唔好唔開心啦！有餅爸錫你及發餅兩個乖仔陪你，唔好去諗D唔開心GE野啦！為左呢D事死左咁多細胞好唔抵架！
唉, 講錢兄弟父母都冇情講, 當年剛畢業, 遇上金融風暴之後, 人工少, 少少地俾住$500做住家用先, 點阿媽第一句問, 夠交電費定水費? 呆了
回覆刪除