瘋癲王子

 9 月 30 日阿娘係舖頭 , 百無聊賴睇 8 掛雜誌 .

內容話 < 一剎那光輝唔係永恆 > 嘅瘋癲王子 , 大鬧屯門市廣場 , 成日搵人嚟鬧 , d sales 都啞忍 , 因為大家可憐佢 !

阿娘睇完準備收舖 , 將雜誌還番俾隔離舖姐姐 , 轉頭就見到一個 50 歲以上 , 身裁高大戴黑超加 Cap 帽嘅男人 , 行入舖頭 , 開口問阿娘 , 想要一頂啱佢嘅帽 ?

循例問佢諗住點用 , 佢話上台用 !

阿娘以為佢係 d 家長日同仔女一齊表現 , 點知佢一除帽 , 就見到佢果幾條有限嘅毛仔 , 有如立法會議員 --- 詹培忠個頭一樣 !

佢話 d 頭髮甩哂 , 又冇人贊助 , 又要趕住上台表演 , 唯有用帽遮住 .

那刻阿娘才認出眼前人 , 就係當年唇紅齒白嘅蔡楓華 , 心想 < 乜咁邪呀 ? 佢會唔會好似 Curious 咁鬧爆阿娘 ? >

自問服務態度良好 , 唯有加多 2 成賣口乖 ..

阿娘話 : 你上台係咪唱歌呀蔡生 ? 我老公屋企成日播你首 < 高溫境界 > , 你肯出返嚟一定有 Fans ! ( 真係真心話 )

蔡生好有禮貌回答 : 以前 d 野唔好提 !

但係下一句就話 : 你唔知咁多 , 香港好多黑社會 ? 說得令人莫名奇妙 ? 最後蔡生冇鬧過阿娘 , 亦有幫襯 !

阿娘中三時 , 曾經同同學仔去廣播道 , 搵明星簽名和合照 , 當然包括蔡生 !

1999 阿娘冇港聞記者撈 , 焗住做左 3 個月娛記 , 同蔡生早已交手 ! ( 好彩佢唔認得發脹嘅餅媽 )

2010 年再見蔡生嘅變化 , 心中忍忍作痛 , 可恨嘅記者 , 親手用一支筆 , 摧毀一個人嘅一生 ! 時至今日仍有娛記 , 將他打造成一個瘋癲嘅人 ?

咁多歌星番唱舊歌 , 何解冇人會揀蔡楓華 d 歌 ? 成龍成日叫娛樂圈團結 , 又有冇人願意伸手幫他 ?